Kvartik-ի գաղտնիության քաղաքականություն

Խմբագրություն՝ 09.11.2026։

Համառոտ

Ձեր տվյալները չեն լքում ձեր սարքը։ Kvartik-ը չունի սերվեր ձեր տվյալներով, չունի հաշիվներ, վերլուծություն, հաշվիչներ և գովազդ։

1. Ով է պատասխանատու

Kvartik-ը ՀՀ անհատ ձեռնարկատերերի համար ծրագիր է kvartik.com կայքում։ Դրա համար պատասխանատու է ԱՁ Էրիկ Չոլախյանը (ՀՎՀՀ 58111423, Երևան), նամակների հասցեն՝ cholakhyanerik@gmail.com։

2. Տվյալները ծրագրում

ԱՁ-ի վավերապայմանները, հաճախորդները, հաշիվներն ու ակտերը, եկամուտներն ու ծախսերը, գրառումների ֆայլերը և լիցենզիայի բանալին պահվում են միայն ձեր սարքի դիտարկիչում։ Ծրագիրը դրանք ոչ ոքի չի ուղարկում՝ ո՛չ մեզ, ո՛չ երրորդ անձանց։ Սա ապահովված է ոչ միայն խոստումով. կայքի անվտանգության կարգավորումները ծրագրին արգելում են դիմել որևէ հասցեի, բացի kvartik.com-ից։

Սարքում ծրագիրը հիշում է նաև իր կարգավորումները՝ պատուհանի լեզուն, փորձնական ժամանակահատվածի սկզբի օրը, վերջին պահուստային պատճենի օրը, պատճենների գաղտնաբառի ստուգիչ արժեքը (ոչ թե գաղտնաբառը), ավտոպատճենի թղթապանակն ու բանալին, եթե այն միացրել եք, ձեր ԱՁ-ների ցանկը, եթե դրանք մի քանիսն են, և թե որ տարբերակն արդեն տեսել եք։ Կայքի հաշվիչում մուտքագրածը նույնպես մնում է ձեր դիտարկիչում, որպեսզի ծրագիրն առաջարկի այն վերցնել պրոֆիլ։ Այս ամենը ջնջվում է կայքի տվյալների հետ միասին՝ դիտարկիչի կարգավորումներում։

3. Ինչ է տեսնում հոսթինգը

Կայքն աշխատում է Cloudflare-ում (Cloudflare, Inc., ԱՄՆ)։ Երբ դուք բացում եք կայքը, կամ ծրագիրը ստուգում է՝ կա՞ արդյոք նոր տարբերակ, դիտարկիչը, ինչպես ցանկացած կայք մտնելիս, Cloudflare-ին փոխանցում է IP հասցեն և հարցման տեխնիկական տվյալները՝ որ էջը կամ ֆայլն է խնդրում, որ դիտարկիչն ունեք։ Ծրագրի ձեր տվյալները այդ հարցումներում չկան։ Նույն կերպ կայքին դիմում են օրացույցի ծրագրերը, եթե դուք բաժանորդագրվել եք ժամկետների օրացույցին։

Cloudflare-ը հարցումների տվյալները պահում է 31 օր, և կայքի սեփականատերը կարող է դրանք տեսնել Cloudflare-ի վահանակում, այդ թվում՝ IP հասցեները։ Մենք դրանք նայում ենք միայն կայքը պաշտպանելու և խափանումները պարզելու համար և ոչ ոքի և ոչնչի հետ չենք կապում. ծրագրի ձեր տվյալները մենք չունենք։ Cloudflare-ը այս տվյալները մշակում է նաև իր գաղտնիության քաղաքականությամբ։ ԱՄՆ-ն ընդգրկված է անձնական տվյալների բավարար պաշտպանություն ունեցող երկրների ցանկում, որը վարում է ՀՀ անձնական տվյալների պաշտպանության գործակալությունը։

4. Պահուստային պատճեններ և ֆայլեր

Պահուստային պատճենն անում եք դուք. դա ձեր գաղտնաբառով գաղտնագրված ֆայլ է։ Գաղտնաբառը ոչ մի տեղ չի պահվում, և այն վերականգնել հնարավոր չէ։ Թե որտեղ դնել պատճենը, PDF-ը կամ հաշվապահի համար արտահանումը՝ փոստ, մեսենջեր թե ամպ, որոշում եք դուք. այնտեղ գործում են այդ ծառայությունների կանոնները։

5. Բանալու գնում

Լիցենզիայի բանալի տալու համար վաճառողին անհրաժեշտ են ձեր ԱՁ-ի ՀՎՀՀ-ն, անունը կամ անվանումը և կոնտակտը, որին ուղարկել բանալին։ Առանց ՀՎՀՀ-ի բանալի տալ հնարավոր չէ. այն տրվում է ՀՎՀՀ-ին և այլ ՀՎՀՀ-ի հետ չի աշխատում։ Վճարման տվյալները վաճառողը ստանում է իր բանկից կամ «Գնել» էջում նշված վճարային ծառայությունից։

Վաճառողն այս տվյալներն օգտագործում է միայն բանալին տալու, հաշվարկային փաստաթուղթ դուրս գրելու և հարկային պարտավորությունները կատարելու համար։ Հիմքը՝ լիցենզիայի պայմանագիրը, որը դուք կնքում եք վճարմամբ, և հարկային օրենքը։ Վաճառողն այս տվյալները և գնման նամակագրությունը պահում է հինգ տարի՝ վաճառքի եռամսյակից հաշված, ապա ջնջում է։ Նա դրանք փոխանցում է միայն հարկային մարմիններին, երբ դա պահանջում է օրենքը. վաճառողին ուղղված նամակներն անցնում են նրա փոստային ծառայությամբ՝ Gmail (Google, ԱՄՆ)։ Վաճառողը դրանցով առաքումներ և գովազդ չի անում։

Հարց կարող եք տալ նաև վաճառողին Telegram-ում. հղումը կայքում է և «Ծրագրի մասին» էջում։ Այնտեղ նամակագրությունն անցնում է Telegram-ով և նրա կանոններով, ուստի ՀՎՀՀ-ն և պայմաններն ընդունելու մասին գրությունն ուղարկեք email-ով։

6. Ձեր իրավունքները

Դուք կարող եք վաճառողից իմանալ, թե ձեր որ տվյալներն ունի նա, ինչու և ինչ հիմքով է պահում և ում կարող է փոխանցել, և պահանջել ուղղել, արգելափակել կամ ջնջել թերի, ոչ ճշգրիտ, հնացած կամ այդ նպատակների համար ոչ անհրաժեշտ տվյալները։ Վաճառողը հայտնում է, թե որ տվյալներն ունի, գրավոր հարցումից հետո 5 օրվա ընթացքում, իսկ ուղղում կամ ջնջում է անմիջապես կամ, եթե անմիջապես հնարավոր չէ, 3 աշխատանքային օրվա ընթացքում։ Մերժումը՝ գրավոր, պատճառով, 5 օրվա ընթացքում։ Հարցումը գրեք այն email-ից, որով գնել եք, կամ էլեկտրոնային ստորագրությամբ. այդպես վաճառողը գիտի, որ գրում եք դուք։ Կարող եք բողոքել անձնական տվյալների պաշտպանության լիազոր մարմնին կամ դատարան։

Ծրագրի տվյալները ջնջում եք դուք ինքներդ. դիտարկիչում կայքի տվյալների մաքրումը ջնջում է ամեն ինչ, ուստի նախ պահուստային պատճեն արեք։

7. Փոփոխություններ

Նոր խմբագրությունը հրապարակվում է այստեղ՝ ամսաթվով, իսկ ծրագիրը դրա մասին կասի «Ինչն է թարմացվել կամ ավելացել» պատուհանում։